• eMEDIA investments EIENDOMS BEPERK (eMEDIA INVESTMENTS)

    Remgro het ’n effektiewe belang van 32.3% in eMedia Investments wat ’n reeks mediabelange besit, waaronder e.tv, Suid-Afrika se enigste onafhanklike gratis televisiekanaal, sy nuusdienssuster, die eNews Africa-kanaal (eNCA), Platco Digital, ’n gratis satellietplatform, Yfm, ’n radiostasie gesetel in Gauteng, en verskeie ander ateljeefasiliteite en produksiebesighede.

    eMedia Investments het ’n Maart-jaareinde en gevolglik is sy resultate vir die 12 maande tot 31 Maart 2017 ingesluit in Remgro se resultate vir die jaar onder oorsig. eMedia Investments se bydrae tot Remgro se wesensverdienste vir die jaar onder oorsig het R49 miljoen (2016: R28 miljoen) bedra.

    eMedia Investments se wins vir die jaar onder oorsig uit voortgesette bedrywighede het R161.5 miljoen (2016: R128.5 miljoen) bedra.

    e.tv se markaandeel het konstant gebly vir die jaar geëindig 31 Maart 2017, maar verbeter in middel- tot hoërinkomste huishoudings. Hierdie verbetering in ‘n sleutelsegment het e.tv se omset op ‘n jaargrondslag met R74 miljoen (6%) verhoog. Die skuif na hoë-end internasionale reekse en films, asook onlangse ooreenkomste wat met Warner, Disney, Sony en CBS aangegaan is, het gehelp om markaandeel, wat voorheen verloor is, terug te wen en te behou. Dit het egter programkoste met 8% laat toeneem. Ander onkoste is goed beheer en e.tv het goeie herstel vanaf sy vorige posisie getoon.

    eSat.tv vertoon steeds goed en die eNCA-kanaal is steeds die 24-uur nuuskanaal met die hoogste kykertalle op DStv, met ’n markaandeel van meer as 50%.

    eMedia Investments se resultate sluit verliese van R307 miljoen in weens die voortgesette belegging in die multikanaalbesigheid waaruit minimale omset tans verkry word. Die OpenView HDplatvorm se aantal geaktiveerde ontvangstoestelle het met 100.1% tot 778 160 (31 Maart 2016: 388 812) toegeneem. Met hierdie verbeterende uitrol, sal die groep goed geplaas wees om sy omsetbasis te vergroot met die aanvang van DTT.

  • ANDER MEDIA- EN SPORTBELANGE